बर्दघाट १२ की २१ बर्षिया युवतीमा कोरोना, भटौलीया बजार शिल

रियाज अलि
नवलपरासी श्रावण २४
समुदायस्तरमा गरिएको कोरोना परिक्षणको क्रममा पश्चिम नवलपरासीको बर्दघाटमा एक जनामा कोरोना भाईरस (कोभिड १९) संक्रमण पुष्टि भएको छ । प्रादेशिक अस्पताल बुटवलको ल्याबमा गरिएको पिसिआर परिक्षणको क्रममा बर्दघाट १२ कि २१ वर्षिय युवतीमा कोरोना पुष्टि भएको हो ।

संक्रमित युवति बर्दघाट वडा नम्बर १३ मा रहेको क्वारेन्टाईनको क्यान्टीनमा काम गर्दे आएको बर्दघाट नगरपालिकाका स्वास्थ्य शाखा प्रमुख माधव ज्ञवालीले जानकारी दिए । बर्दघाट बाट समुदायस्तरको कोरोना परिक्षणको क्रममा १ सय २५ जनाको स्वाब संकलन गरि पठाईएकोमा एक जना बाहेक सबै कोरोना संक्रमण मुक्त छन् ।

संक्रमित युवतीको कन्ट्रयाक ट्रेसिङका क्रममा गत साउन ९ गते आमाको उपचारका लागि भारतको निचलौल पुगेर एक रात बसेर फर्किएको भन्ने खुलेको स्वास्थ्य शाखा प्रमुख माधव ज्ञवालीले बताए । सुरुवातमा भारत गएको भन्ने कुरा स्विकार नगरेपनि धैरेवेरको केरकारपछि आमाको उपचारका लागि भारतको निचलौल पुगेको र एक रात बसेर फर्किएको युवतीले स्विकार गरेको ज्ञवालीको भनाई छ । युवतीमा संक्रम भए पनि कोरोना समुदाय स्तरमा फैलिसकेको भन्ने अवस्था नरहेको र उनी भारत पुगेकै कारण उतैबाट संक्रमित भएर आएको हुन सक्ने ज्ञवालीले बताए ।

युवतीको वडा नम्बर १२ भटौलीया बजारमा मिष्ठान्न भण्डार संचालन गर्ने भएकोले केहि दिन अघि जनैपूर्णिमाको दिनमा भटौलीया बजारबाट मिठाई बेच्ने काम गरेको समेत पाईएको वडा अध्यक्ष मान बहादुर मल्लले बताए । उनी मार्फत अन्यमा कोरोना संक्रमण फैलिए स्थिति भयाभय हुने मल्लको भनाई छ । तत्कालका लागि भटौलिया बजार पूर्णरुपमा सिल गरिसकिएको र वडा सिल गर्न पर्ने नपर्ने भन्ने विषयमा छलफल भैरहेको वडा अध्यक्ष मल्लले बताए ।

यस संगै पश्चिम नवलपरासीमा समुदायस्तरमा गरिएको कोरोना परिक्षणका क्रममा हाल सम्म ३ जनामा संक्रमण देखिएको छ । यस अघि रामग्राममा दुई जनामा कोरोना देखिएको थियो । जिल्लाभर संक्रमितको संङख्या १ सय २५ पुगेको छ । समुदायमा कोरोना फैलिएको छ कि छैन् भनी परिक्षण गर्न प्रदेश सरकारले प्रदेश पाँचका ६ जिल्लामा पहिलो चरणमा स्वाब संकलन गरि परिक्षण गर्दे आएको छ ।

जस्मा पश्चिम नवलपरासी बाट पनि सबै स्थानिय तहबाट फरक फरक क्षेत्रमा काम गर्दे आएका व्यक्तिहरुको र्यान्डम टेष्टका लागी स्वाब संकलन गरि पठाईएको थियो । जस मध्ये सुनवल र प्रतापपुर बाट स्वाब पठाईएका सबैको रिपोर्ट नगेटिभ आएको छ भने सुस्ता र पाल्हीनन्दन गाँउपालीकाबाट स्वाब पठाएकाको पिसिआर परिक्षण रिपोर्ट आउन बाँकि रहेको स्वास्थ्य कार्यालयले जनाएको छ ।